تنهایی

 

سیل گؤزوندن آخان یاشی
سن آغلاسان، من آغلارام
گؤینر اوره ییمن باشی
... سن آغلاسان، من آغلارام

سن گولنده چمن گولر
قرنفیل، یاسمن گلر
ائللر گولر، وطن گولر
سن آغلاسان، من آغلارام

گولوش دوداغین اؤپنده
سئوینجه دولورام منده
ایکی روحوق بر بدنده
سن آغلاسان، من آغلارام

آیدان دئییر آغلار گؤزون
ایچیمده کی اوره ک سؤزوم
قوی من دئییم سؤزون دوزون
سن آغلاسان، من آغلارام

سنسن منیم آرخام- ائلیم
سنسن منیم اؤتگن دیلیم
سن اولماسان سینار بئلیم
سن آغلاسان، من آغلارام

گل! قوی بوتون دونیا گولسون
گول سئوینسین صحرا گولسون
غمدن دولان شئیدا گولسون
سن آغلاسان، من آغلارام

 

نوشته شده در پنجشنبه یکم خرداد 1393ساعت 18:50 توسط ali|


آخرين مطالب
»

Design By : Pichak